Est 2 | KYG | STEP | Kini vekamo'a aipamo le'niya kava'amo hano hutegeno'ae'mo halate kuvini a kanomo Vasiti'a hosu kava'mo hu'nigeno hafaino atale'niya ke'aepa gemo avo'mo kae male'niya gee'mo agesamo afi'niye.

Esther 2

Esata'a Kuvini a kanomo hamale'niya ava gemae

1 Kini vekamo'a aipamo le'niya kava'amo hano hutegeno'ae'mo halate kuvini a kanomo Vasiti'a hosu kava'mo hu'nigeno hafaino atale'niya ke'aepa gemo avo'mo kae male'niya gee'mo agesamo afi'niye. 2 Kini vekamo vaya'amo mai'ne'a no'afi'mo ali'ya'amo ne'aliya vaya'mogi kini vekae'mo, mago alagepa apakufamo hane'nisiya a'mafa'ne anaga'mo ve'e'mo magokepi lokae'a ohavae'nisaya a'mafa'ne anaga'aife'mo kahauya hugae. 3 Kagaemo mago gamani vaya'mo muki ne'yagaina kotegamo mai'naya vayapati'mo mago vaya'mo lekana paika apatesanage'a alagepa apakufamo hane'nisiya a'mafa'ne anaga'mo apavaleli e'a Susa taonimo gamani lafi kegi'yafi'mo a'ne anagakamo ne'maiya nopi'mo apategae. Hegai'a kagae a'ne anaga'aite'mo yagaino ne'apateya vekamo'mo yagaino apategaiye. Yagaino ne'apatesige'apae'mo kaha'ye hisiya agufa apakufamo alino hamalesiyafe'mo ani a'nemogi uvelimo falete'a apakufale'mo konalimo alite'a maiyo. 4 Inagi ani a'ne anagapati'mo mago afe'mo kahau'nisiya a kanomo kuvini a kanomo maisiyafe'mo lekana paika atesanageno Kuvini a kanomo Vasiti aimu'yale'mo maigiye. Kini vekamo'a ani gemo afiteno'ae'mo hau'nigeno ani gemo akame hu'niye.

5 Susa taonimo gamani lafi kegi'yafi'mo mai'niya Yu vekamo agi'amo Motekai'ae. Motekai afo'amo'mo Yai'ae. Yai afo'amo'mo Simai'ae. Simai afo'amo'mo Kisi'ae. Motekai'mo Menisameni nofi vayapati vekamo mai'niye. 6 Akeya'vilaga kini vekamo agi'amo Nepukanesa'a Mamiloni kotegati'mo eno Yu vaya'aite'mo yagaino ne'apateya kini vekamo Yehoiyakini'e Yu vaya'e'mo apavalelinuno Mamiloni kotegamo kalavusi huno apate'niye. Ani afina'mo Motekai afo'amo'e'mo avalelino u'niye. 7 Motekai'a mago a'mafa'nemo agi'amo Esatate'mo yagaino ate'niye. Himalu gefati'mo Hanasa'ae hu'a agi ae'nae. Esata'a Motekai afo'amo agana'amo a'mafa'nemo mai'niye. Mai'niya'monanafa afo'amo'e ita'amo'e'mo ago falita'ageno Motekai'a Esata'mo avaleno a'mafa'ne'a ya huno ne'agaiya a'mafa'nemo mai'niye. Esata'a alagepa augosa'e agufa'e'mo hane'niya a'mafa'nemo mai'niye.

8 Kini vekamo ke'aepa ge'amo ae'a hakalo hu'a hapa pai'nage'apae'mo asole a'mafa'ne anaga'mo apavaleli e'a Susa taonimo gamani lafi kegi'yafi'mo apate'nageno Hegai'a yagaino apate'niye. Ani afina'mo Esata'e'mo avaleli e'a kini vekamo lafi kegi'ya yu'ilagamo ate'nageno a'ne anaga'aite'mo ne'yagaiya vekamo Hegai'a yagaino ate'niye. 9 Agaemo Esatafe'mo hau'nigeno amuse huno ate'niya'mofe'mo malage huno agufamo alino alagepa huno atesiya ya'e alagepa ne'ya'e'mo alino ami'niye. A'ne anaga'ai nopi'mo mago hogote'a ae'a anagi male'naya yapi'mo maisiyafe'mo Esata'mo alino ateteno'ae'mo seveni'a a'mafa'ne anaga'mogi kini vekamo nopi'mo ali'ya'mo ne'aliya a'mafa'ne anaga'aife'mo, alagepa hutapa Esatate'mo yagaitapa ateyo, huno hapa pai'niye.

10 Hogoteno Motekai'a Esatafe'mo, Yu nofi a'mafa'nemo mai'nove, huka hapa opaiyo, huno ha pai'nigeno ani gemo afiteno akame huno mai'niye. 11 Muki afina'ae'mo Motekai'a a'ne anaga'ai no lafi kegi'ya malaga umenitata huno mai'niye. Agaemo Esata'a haiya kava huno mai'nifi huno apafige na agufa kava'mo Esatategamo nehafi huno apafige hisiyafe'mo uno mai'niye.

12 Kini vekamo'mo apakufae'mo ageno ha'ye hisiyafe'mo magoke kafugamo ani a'ne anaga'mo ali'a alagepa hu'a apate'nae. Sigisi kaile'mo apakufale'mo mago yosamo agi'amo meyae hu'a agi ne'aya yosafati'mo kola uvelimo he fi'a alini'e'a apakufale'mo fale'a apate'nae. Mago alu sigisi kaile'mo mago uveli'e mago alagepa atu ne'aiya masave ani'e'mo ali'a fale'a apate'nae. Ani kava'mo hu'a hano hutage'apae'mo magoke magoke a'mafa'nemo apavaleli'a kini vekamo Sekisitegamo u'nae. 13 Inagi muki a'mafa'ne anaga'mogimo kini vekamo nopi'mo ugefe'mo hu'apae'mo alagepa kukenamo apakai'apimo hapau'niya agufa kukenamo ali'a vaili'a ute ute hu'nae. 14 Une'mo kini vekamo nopi'mo faleno haino maime uno netepi'mo a'ne anaga'ai nopi'mo e'niye. Mago vekamo Sasigasi kini vekamo'a napa tu a'ne anaga'ai note'mo ne'yagaiya vekamo ayapi'mo apate'nae. Ani a'mafa'nemo'mo kini vekalegamo halate mago'e huno o'ugiya'monanafa henaga'amo kini vekamo'a agaefe'mo hausigeno'ae'mo agi aeno ge hisigeno halate agaetegamo ugiye.

15 Inagi Esata'a kini vekalegamo visiya afina'amo ago afole ai'niye. Ani a'mafa'nemo Amihaili a'mafa'nemo mai'nigeno Amihaili'a Motekai avu'amo'mo mai'niye. Motekai'a Esata'mo avaleno a'mafa'ne'a ya huno agai'niye. Muki vaya'mogimo Esata'mo agete'apae'mo amuse hu'a ate'nae. Inagi Esata'a kini vekamo uno agesiyafe'mo huno'ae'mo, mago ya'mo namiyo, huno ge osu'niya'monanafa Hegai'a a'ne anaga'aite'mo ne'yagaiya vekamo'a hau'niya kukenamo alino vaiteno u'niye. 16 Ani afina'mo Sekisi'a seveni'a kafugamo kini vekamo mai'neno yagaino apate'niye. Ani kafugamo teni kaie'mo agi'amo Temetiye, hu'a agi ne'aya kaile'mo Esata'a avaleli'a kini vekalegamo u'nae. 17 Kini vekamo'a Esatafe'mo mago'e huno hau ayamopafi'mo hau'nigeno mago alu a'mafa'ne anaga'mo ve'e'mo magokepi lokae'a ohavae'naya a'mafa'ne anaga'aife'mo ohau'niye. Kini vekamo'a mago'e huno amuse huno ate'niya'mofe'mo Esata agenopale'mo kuvini kakolitamo alino maleno ateteno Kuvini a kanomo Vasiti aimu'yale'mo alino ate'niye. 18 Inagi kini vekamo'a Esata'mo lusi yagita huno ate'niye. Agaemo muki hogote vaya'e gamani vaya'efe'mo ge hu'nige'a e'a ne'nae. Kini vekamo'a, Nagaemo Esata'mo kuvini a kanomo maisiyafe'mo lekana pai'na ate'nova'mofe'mo nagaemo muki ne'yagauva kote'mo mai'naya vaya'mo maitapa falu hiyo, huno hapa paiteno muki vaya'mo mago'e huno alagepa ya'mo alino apami'niye. Kini vaya'mogimo ali'a ne'apamiya agufa kava huno mago'e ya'mo alino apami'niye.

Motekai'a kini vekamo ha mae'nigeno kini vekamo ofalino afa'a mai'niya gemae

19 Napa tu afina'mo ve'e'mo magokepi lokae'a ohavae'naya a'mafa'ne anaga'mo apavale'a ali'a anupa hu'a apate'nageno Motekai'a kini vekamo lafi kegi'ya yu'ilaga kate kipate'mo ala apaki vaya'e'mo magokepi lokaeno mai'niye. 20 Hogoteno Motekai'a Esatafe'mo, Yu nofi a'mafa'nemo mai'nove, huka vaya'aife'mo hapa opaiyo, huno ha pai'niye. Esata'a Motekai'mo yagaino ate'niya afinateti'mo ge'amo afiteno akame hu'niya kava huno ani afina'e'mo ge'amo afiteno akame hu'niye. 21 Motekai'a kini vekamo lafi kegi'ya yu'ilaga kate kipate'mo itopale'mo mai'niya afina'mo lole vekala'moganimo kini vekamo lafi kegi'ya yu'ilaga kate kipate'mo ne'yagai'a vekala'ani anaki'animo Mikitana'e Telesi'e'mo anaipamo le'nige'ana kini vekamo amagisa'ageno falisiyafe'mo vegemo hu'na'ae. 22 Motekai'a ani lole vekala'mogani hu'na'a gemo afiteno'ae'mo uno Kuvini a kanomo Esatafe'mo ha pai'nigeno Esata'a Motekai agi'alefe'mo uno kini vekae'mo ha pai'niye. 23 Ani gemo aepa'ae'mo kahauya hu'nayana alagi lama ge gemo hu'na'a gemo afi'nae. Afi'naya'mofe'mo apakaemo ani lole vekala'mo anavaleli u'ana yosale'mo anane'mu ae'ana asai'na'age'ana fali'na'ae. Kini vekamo aulagale'mo ani kavafe'mo ava gemo gamani vaya'ai mukufi'mo avo'mo kae male'nae.